Solveig Hareide er programleiar i Newton på NRK. Der har ho mellom anna sendt ein dings ut i verdsrommet og testa kven som er smartast av hundar og kattar.

Forfattaren Roald Kaldestad har mellom anna skrive tre artige bøker om Heavykatten. Han er frå Stord, spelar gitar og skriv låtar i tillegg til å skrive bøker.

Forfattaren Ragnar Hovland har skrive mange artige tekstar, mellom anna den om grisen som står og hyler! Han har også gitt ut ei bok som heiter "Katten til Ivar Aasen møter hunden frå Baskerville". Nyleg fekk han Nynorsk barnelitteraturpris 2006 for boka "Fredlaus".

Ragnfrid Trohaug er barnebokredaktør i Det Norske Samlaget. Det er faktisk jobben hennar å lese barnebøker og avgjere kva slags bøker forlaget hennar skal gje ut. Ho er også forfattar og har skrive bøker både for barn og vaksne.

Runar Gudnason er kanskje mest kjend som Sjef R, sjefsrapparen i Side Brok. Han kjem frå Hovdebygda (ikkje langt frå Aasen-tunet), men bur til dagleg i København. Det var først etter at han kom til København at han byrja å skrive gode rappetekstar på dialekta si.

Per Olav er programleiar i Newton, vitskapsprogrammet for born og unge som går på NRK1 kvar søndag.

Erle er redaktør i barnebokklubben Blåmann. Ho får med andre ord betalt for å lese bøker. Kvar månad sender ho ut eit brev til alle medlemmene sine med tilbod om ei eller fleire nye gode bøker.

Tone blei nummer to i tredje runde av "Idol", og har i haust dansa seg inn i dei norske stovene i "Skal vi danse".

Maria Parr har skrive den underhaldande boka "Vaffelhjarte" om alt det rare som kan skje i vika "Knert-Mathilde". Du kan høyre utdrag frå "Vaffelhjarte" under vignetten Lydbøker.

Odd Nordstoga blei landskjend over natta då han song om grisen som hyler, men han er glad i kattar óg.